ХЪÆУУОН ХÆДЗАРАД

Ацафон хæдзарадты быдырты змæлд фæ-мынæгдæр вæййы. Зæхкусджыты сисын хъуыд сæ æфсирджын хортæ æмæ тыллæг      къæбицтæм бахæццæ. Фæззыгæнд мæнæу сæм тыд уыд 1220 гектары.

Уыдонæй – 60 гектары Шанаты Хъазыбеджы номыл колхозы, 160 – Плиты Иссæйы номыл колхозы, 250 – хъæууон-хæдзарадон кооператив «ДОН»-ы, 500 – кооператив «Ирбис»-ы. Рæстæмбис нымадæй гектар радта 30 центнеры.

 

– Ныртæккæ хор ныссыгъдæг кодтой, æмæ æфснайд у мусты. Хъуамæ иу-дыууæ мæйы афтæ алæууа, раздæр ссадæн нæма фæбæззы, – загъта нын районы администрацийы хъæууон-хæдзарады управленийы сæйраг специалист   Туаты Зелим.

Хъæууон-хæдзарадон кооператив «Ирбис»-ы ма конд уыд уалдзыгæнд хъæбæрхор, кæцыйæ систой 250 тоннæйы. Цы зæххытæ суæгъд, уыдон цæуынц хуымгонд æмæ сæ цæттæ кæнынц фидæны тыллæгæн.

Æфснайын ма цы хортæ хъæуы, уыдонæй йæ рад æрбахæццæ кæны æхсынæнæн. Районы хæдзарадтæм дзы конд ис 670 гектары. Ис хорз уавæры, бæрзонд тыллæг райсынмæ æнхъæлмæ кæсынц фæллойгæнджытæ.

Сентябры кæрдын райдайдзысты механизатортæ сæ сойæты хуымтæ (992 гектары) æмæ раздæр цы нартхор сцæттæ вæййы, уый. Ныртæккæ цæттæ кæнынц сæ техникæ.

ХОСОНТЫ Земфирæ.