НÆ ЦАРДЫ УАГ

Æрæджы газет «Рахизфарсы царды» бакастæн æхсæнадон уацхæссæг Хъуыдакаты Хъасболаты уацхъуыд. Уый мæнмæ фæкастис тынг раст. Иуæй-иу хистæртæ сæхæдæг дæр кæм-дæрты рæдийынц. Ау, хистæр хъуамæ ма бакæса, йæ хуынд адæм цавæр фынджы фарсмæ бадынц, уымæ? Хæдзары хистæр хъуамæ дæтта дзуапп йæ хуынд адæмы тыххæй сæ хæрдæн дæр æмæ сæ нозтæн дæр. Цæмæн хъæуынц фынгыл утæппæт хæринæгтæ æмæ нозтытæ, ахсæн иу йеддæмæ куы нæ у, уæд?

Æз мæ дæргъвæтин царды бирæ хабæртты сæмбæлдтæн. Иу ахæмы хæрз æрыгон чызгæй уыдтæн Заманхъулы чындзхæссæг. Бæцæзаты Мæмæтатæй хастам чызг Зæронд Бæтæхъойыхъæумæ. Уым æз цы хорз æгъдау федтон, уый абон дæр ма мæ зæрдыл лæууы. Хъаст стынг Бæцæзаты дынджыр кæрты, фæйнæгыл та дзы æмдзæгъд кодтой. Йæ кары чи бацыд, ахæм нæлгоймæгтæ мах, чындзхæссæг чызджыты, фынгмæ бахуыдтой. Фынгыл æвæрд уыдис æртæ уæливыхы, хъайла, лывзæ æмæ ирон бæгæны, Мах уыцы фынг гыццыл йеддæмæ нæ бакъахыр кодтам. Уæды рæстæг хæринагæй фаг бахæрын йæ сæрмæ хæсгæ дæр ничи кодта. Уайтагъд сыстадыстæм æмæ кæртмæ хъастмæ рацыдыстæм.

Ныртæккæ фынгыл цы хæринæгтæ æвæрынц, уыдонæн æфсæйнаджы гуыбын хъæуы. Стæй зæрдæйæн дæр тынг уæззаудзинад дæттынц. Ныр-тæккæйы рæстæг адæм хæрынмæ тынг здæхт сты, фæлæ уый у низ, адæймаг цас къаддæр хæра, уыйбæрц ын æнцондæр у. Дзаджджын фынгтыл вæййы ахæм хæринæгтæ: алыхуызон уæливыхтæ, фыдджынтæ, фæткъуыджынтæ, алыхуызон адджын тъортытæ, къуылдых фых стæй физонæггонд дзидза, карчы фыд фыхæй, зариттæй, кæсаг, сау кæнæ сырх еугæф, ссад дзидзайæ конд хæринæгтæ, цыхт, къалбас, цалдæр хуызы салаттæ, дыргътæ, халсартæ, харбыз, неси, къозотæ, мандаринтæ, банантæ, алыхуызон къафеттæ, адджын дæттæ, сæнтæ, водкæ… Се ‘ппæты фыссын мæ цæсгом нал хъæцы, раст цыма мæнæн хæринаг сты, уыйау мæ зæрдæ срысти.

Иуахæмы рынчындоны хуыссыдтæн, æхсæвы къæлидоры бæстæ уынæр ссис. Кæсæм æмæ нæ палатæмæ иу усы йæ цæнгтыл хæцгæ æрбакодтой. Хъæр-цъæхахст кæны, фæмæлын, зæгъгæ. Мах афтæ банхъæлдтам фæндаккон фыдбылызы бахауд. Уалынмæ рады дохтыр 'рбацыд æмæ йæ фæрсы: «Абон цы бахордтай?» Ус тыххæй сдзырдта: «Нал æй зонын». Уæд та йæ дохтыр бафарста: «Мæнæ дæ ныр ардæм кæцæй æрбаластой?» «Кæхцгæнæны фынгæй», — загъта хъæрзгæ.

Дохтыр бахудти: «Уæдæ йæ уæд æцæг нæ зоныс цы бахордтай, уый, уымæн æмæ дзы кæцы ранымайай?» Дохтыр медицинон хотæн бафæ-дзæхста, йæ ахсæн ын расыгъдæг кæнут, зæгъгæ… Йæ ахсæн куы сафтид, уæд ын фенцондæр. Капелницæ йын сæвæрдтой, укол ын скодтой æмæ ус фæлладæй афынæй. Райсомæй куы райхъал, уæд йæхицæн хъуыр-хъуыр кæны: «Æнæ-хайыр фæуæд, мæ фарсмæ чи бадт, уый, иууылдæр мын сæ мæ размæ бырын кодта». Йæ дзабыртæ акодта æмæ йæ хæдзармæ афардæг. Чи уыд, уый дæр нæ базыдтам.

Уæ хорзæхæй, хорз адæм, дзурын мæхи карæнтæм. Ахæм фынгæвæрд уæм хорз кæсы?

КЪУБАЛТЫ Рая, Бæтæхъойыхъæуы цæрæг. Мæ телефон у: 54-2-68.