201854 02ХЪÆУЫ ЦАРДÆЙ

Дунескæнæг адæмæн цы хæзнатæ балæвар кодта, уыдонæй тæккæ вазыгджындæр у æвзаг. Уый руаджы æвдисынц сæ хъуыдытæ, сæ монцтæ, сæ бæллиццтæ.

Æрæджы Раздзоджы Культурæйы хæдзар æмæ библиотекæйы уыдис мадзал, кæцыйы ма иу хатт æркастыстæм нæ ирон æгъдау, нæ культурæ, æвзаджы равзæрд æмæ фидæнмæ. Архайдтой дзы канд культурæйы кусджытæ æмæ скъоладзаутæ нæ, фæлæ хъæуы администрацийы кусджытæ Дзодзиаты Чермен æмæ Галазты Маринæ, хъæуы цæрæг Танделаты Риммæ. Равдыст байгом кодтой Танделаты Вано æмæ Дианæ. Уыдон ма нын иу хатт нæ зæрдыл æрлæууын кодтой, кæддæр нæ фыдæлтæм кадджын чи уыд, фæлæ ныртæккæ рохуаты чи аззад, уыцы æгъдæуттæ æмæ рагон куывдтытæ. Хъæуы хицау Дзодзиаты Чермен нын радзырдта, нæ алыварс цы топонимикон иуæгтæ ис, уыдоны равзæрд æмæ нысаниуæджы тыххæй. Саби-тæм бирæ фарстатæ уыдис, фæлæ сæ сæйрагдæртæ баст уыдысты Фыдыбæстæйы Стыр хæстимæ.

 

Чермен нын ахæм цымыдисаг цау радзырдта:

— Немыц Кавказмæ куы æрбацæй хæццæ кодой, уæд нæ районы хицауад Раздзоджы хъæумæ æрбарвыстой цалдæр уæрдоны, адæмы хохмæ æдас ранмæ аласæм, зæгъгæ. Фæлæ хъæуы хистæртæй иу Къозаты Тæтæрхъан цæхгæр ныллæууыд, æз ам базæронд дæн æмæ мæ хæдза-рæй никуыдæм цæуын, зæгъгæ. Хъæуккæгтæ дæр йемæ сразы сты æмæ нæ фæрæдыдысты. Ирыстоны тынг карз хæстытæ цыдис, мах хъæумæ немыц не ‘рбахæццæ сты. Уымæ гæсгæ сæхи бахызтой фыдбылызæй.

ЮНЕСКО-йы хаццæгтæм гæсгæ, ирон æвзаг бахаудта фесæфынæй тас кæмæн у, уыцы номхыгъдмæ. Фæлæ уый раст нæу, рæзгæ фæлтæр сæ мадæлон æвзагыл куы дзурой, куы йæ уарзой, куы йæ хъахъхъæной, уæд уыцы æвзагæн бамынæг, бамыргæнæн нæй.

СОКЪАТЫ Людæ.