201854 03ÆРКАСТ

Цыппар азы размæ нæ республикæйы фæзынд ног æхсæнадон змæлд «Иудзинад». Змæлды уæнгтæ архайынц ирон æвзаджы рæзтыл, не` гъдæуттæ бахъахъхъæныныл, сæ райрæзтыл æмæ сæ кæстæртæм рæсугъдæй адæттыныл. «Иудзинад» куыд Дзæуджыхъæуы, афтæ республикæйы районты фæсивæды 'хсæн саразынц алыхуызон фембæлдтытæ æмæ конкурстæ.

Хуымæллæджы астæуккаг скъолайы æрæджы ацыд æркаст-конкурс «Ирон дæн æз» чызджыты æхсæн. Сæ арæхстдзинад дзы æвдыстой дæс ерысдзауы – Боциты Миланæ (Беслæны 2-æм скъолайы ахуырдзау), Мæргъиты Алинæ (Беслæны 4-æм скъола), Багаты Каролинæ (Беслæны 6-æм скъола), Габочиты Дианæ (Беслæны 7-æм скъола), Хъуысаты Раисæ (Фарныхъæу), Рогуль Камиллæ (Хуымæллæг), Быгъуылты Эльмирæ (Хуымæллæг), Къубалты Алинæ (Бæ-тæхъо), Тотраты Алинæ (Ольгин-скæйы скъола), Цхурбаты Еленæ (Брут).

Мадзал байгом кодта æмæ йæ амыдта Лазарты Зæлинæ. Базонгæ кодта ерысдзауты жюрийы уæнгтимæ. Уыдон уыдысты: Абойты Заур – Рахизфарсы районы администрацийы сæргълæуæджы хæдивæг, Хъуысаты Эммæ – ахуырады управленийы методист, 4-æм рæвдауæндоны ирон æвзаджы ахуыргæнæг Бадзиаты Аллæ, Къубалты Зинæ — сылгоймæгты советы архайæг, æхсæнадон змæлд «Иудзинады»-ы минæвæрттæ – Мамийаты Тамерлан, Бæйсæнгъуырты Мухтар æмæ Бозраты Агундæ.

– Хъыгагæн, ныртæккæ фæсивæды æхсæн ис, иронау чи нæ дзуры, ахæмтæ, – загъта Абойты Заур. – Абон фендзыстæм, нæ районы чызджытæ ирон æвзаг, культурæ æмæ æгъдау куыд зонынц, уый. Ацы чызджытæ сты фæзминаг сæ æмгæрттæн.

Конкурсы фыццаг хæслæвæрд хъуамæ баххæст кодтаиккой рага-гъоммæ, ныффыстаиккой нывæцæн «Ирон дæн æз». Сæ нывæцæнтæ дзырдтой ирон аив æвзагыл.

Хæслæвæрды фæстæ сценæмæ рацыд фондзаздзыд фæндырдзæгъдæг Богъаты Дзерассæ (къамы). Уый фæстæ бæрæгбон амонæг Дулаты Ритæ сценæмæ хонын райдыдта, рагацау цы фæтк сбæрæг кодтой, уымæ гæсгæ конкурсы архайджыты.

Ерысы дыккаг хæслæвæрды чызджытæ æвдыстой ирон бæрæгбæттæй сæ зонындзинæдтæ. Æртыккаг хæслæвæрд баст уыд ирон чындзæхсæвы æгъдæуттимæ. Ерысы дарддæры этапы чызджытæ равдыстой сæ æрмдæсныдзинад, ирон сылгоймаджы кусæнгæрзтæй архайын куыд зонынц, уый. Кæм-иу рæдыдысты, уым сын æххуыс кодтой конкурсы жюрийы уæнгтæ. Фæндзæм хæслæвæрдмæ чызджытæ бацæттæ кодтой рагацау. Ерысдзаутæ сарæзтой бæркадджын фынг ирон хæринæгтæй. Бæлвырд радзырдтой, нæ фыдæлтæ цавæр хойрæгтæ цавæр бæрæгбæттæм кодтой, уый тыххæй. Кæронбæттæны сæхи равдыстой аивадонсфæлдыстадон ерысы. Æрцæттæ кодтой зар-джытæ, кæфтытæ, кастысты æмдзæвгæтæ, спектаклы скъуыддзаг.

Жюрийы уæнгтæн зын уыд хуыздæрты сбæрæг кæнын. Фæлæ æнæ уæлахиздзаутæй ерыстæ нæ вæййынц.

Фыццаг бынат лæвæрд æрцыд Хуымæллæггаг астæуккаг скъолайы ахуырдзау Рогуль Камиллæйæн, дыккаг – Хъуысаты Раисæйæн Фарныхъæуæй. Æртыккаг бынат адих кодтой Беслæныхъæуы чыжджытæ Багаты Каролинæ æмæ Мæргъиты Алинæ. Хорзæхгонд æрцыдысты Кады нысаны гæххæттытæй æмæ æхцайы фæрæзтæй ахуырдзаутæ дæр æмæ сæ ахуыргæнджытæ дæр.

Куыд конкурсы архайджытæ, афтæ Кады гæххæттытæ æмæ зæрдылдарæн лæвæрттæ саккаг кодтой иннæ ерысдзаутæн æмæ сæ ахуыргæнджытæн.

Æхсæнадон змæлд «Иудзинады» уæнгтæ арфæ ракодтой Хумæллæджы скъолайы директор Бититы Эльви-рæйæн дæр, фадат сын кæй сарæзта бæрæгбон ацæуынæн, уый тыххæй. Кады гæххæттытæ æмæ зæрдылдарæн лæвæрттæ саккаг кодтой Лазарты Зæлинæйæн æмæ Богъаты Дзерассæйæн.

Уый уыдис районы æхсæн конкурс. Фæлæ зæрдæвæрæны мæйы 3-æм боны Дзæуджыхъæуы ацыд республикон æркаст-конкурс «Ирон дæн æз»-ы кæронбæттæн.

Уырдæм сæ арæхстдзинад равдисынмæ æрбацыдысты, районты æмвæзады ерысы чи фæуæлахиз, уыцы чызджытæ. Рахизфарсæй уыдысты Рогуль Камиллæ æмæ Хъуысаты Раисæ.

Зæгъын æмбæлы, нæ районы чызджытæ сæхи алы этапы дæр хорз æвдыстой, зæрдиагæй бацæттæ кодтой. Фæлæ, хъыгагæн, жюрийы хатдзæгтæм гæсгæ бынæттæ нæ бацахстой. Æнæ Кады гæххæттытæ æмæ зæрдылдарæн лæвæрттæй сæ нæ ныу- уагътой.

Æхсæнадон змæлд «Иудзинад»-ы архайджытæ арфæ ракодтой Хумæллæджы скъолайы ахуырдзауæн Рогуль Камиллæйæн.

– Камиллæ ирон нæу, фæлæ нын не`взаг, не`гъдау æмæ культурæ зоны æмæ уарзы, – бахах кодта æхсæнадон змæлд «Иудзинад»-ы уæнг Байсæнгъуырты Мухтар. – Емæ мæ фæнды, цæмæй афтæ сæ мадæлон æвзаг уарзой Ирыстоны фæсивæд. Камиллæ хъуамæ уа фæзминаг.

Фæззæджы райдайдзæн æркаст-конкурс «Ирон дæн æз» лæппуты æхсæн. Азæй азмæ ерысдзаутæ вæй- йынц фылдæр. Рахизфарсы районы скъоладзаутæ вæййынц тыхджын ерысгæнджытæ, уый загътой «Иудзинады» уæнгтæ дæр.

Уырны мæ – иннæ хатт фыццаг бынат уыдзан мах!

НАЛДЫХЪУАТЫ Алинæ.