Хъæууон хæдзарады ахсджиагдæр бынат ахсы фосдарынад. Кæд хæрз æрæджы дæр ма сæфты къахыл лæууыди, уæддæр ныридæгæн сабыргай йæ кæддæры къæпхæнмæ хизы.

Уымæн æвдисæн Бæтæхъойыхъæуы хъæууон-хæдзарадон-куыстадон кооператив «Арт»-ы æхсыры-товарон фермæ. Ам ис мин стуры. Уыдонимæ 160 сæры дуцгæ хъуццытæ, иннæтæ – родтæ, галтæ, дыгæрдгуытæ. Алы хъугæй дæр рæстæмбис нымадæй æрдуцынц 12-14 литры, иуæй-иу стуртæ та дæттынц 30 литрмæ æввахс æхсыр.
Хъугдуцджытæ Сартуаты Земфирæ, Дзодзиаты Маринæ пайда кæнынц нырыккон кусæн гæрзтæй, ис сæм цалдæр дуцæн аппараты. Уырдыгæй æхсыр хæтæлтыл цæуы фæрсудзæнтæм, стæй та стыр бæрцуатмæ. Куы ныууазал вæййы, уæд дзы цыхтахсджытæ Къубалты Альмирæ æмæ Къубалты Алинæ ахсынц хæрзад, хæрзхъæд цыхт. Пайда кæнынц ахсæнæй.
Алы куыстæн дæр йæ райдайæн хæрзхъæд æрмæг у. Стурты мыггæгтæ сты цалдæр хуызы – Швиц, Сырх быдираг, Ярославаг æмæ æндæртæ.
Фосы пайда уыйас нывыл нæ уаид, ветеринарон æгъдауæй сæм бæстон каст куы нæ цæуид, уæд. Ацы куыст кæны диссаджы адæймаг, йæ зонындзинæдтæ æнæкæрон бирæ кæмæн сты, уыцы Кудзаты Батраз (галиу къамы, фос чи дары, уыдон æй хорз зонынц). «Почетный гражданин», зæгъгæ, уыцы ном аккаг у ныртæккæ Батраз.
Бæрæг у, ацы хæдзарады бирæ хорздзинæдтæ ис – хæрзхаст фос, сыгъдæг скъæттæ, алы уавæртæ фæллой кæнынæн, химæ базилынæн æмæ фæллад суадзынæн агъуыстытæ, хорз адæм. Уыдон иууылдæр къухы æфтынц Уалыты Элинæйы руаджы. æрыгон чызг, хъæууонхæдзарадон академи каст фæуыны фæстæ, къорд азы кусы ацы куыстуаты. Йæ размæ æвæрд хæстæ тынг хорз æххæст кæны, иумæйаг æвзаг ары кусджытимæ дæр, уый та ныртæккæ тынг ахсджиаг у.
Фидæны сæ зæрды ис хæдзарад фæуæрæхдæр кæнын. Ныртæккæ уал сæм ис мæргътæ, фыстæ, сæгътæ, суанг ма теуа дæр.
Цасфæнды сæ куы ‘ппæлæм, уæддæр ацы æнтыстдзинæдтæ сæ къухы уыййас нæ бафтыдаид, Уататы Анфисæ (къамы) сын æрвылбон хъарм, хæрзад, хæрзхъæд хæринаг куы нæ кæнид, уæд. Йæ куыстуат алы хатт дæр у сыгъдæг, санитарон æгъдæуттæн дзуаппдæттæг.
Кооператив «Арт»-мæ ма ис хуымзæххытæ дæр. Ныртæккæ фæвæййынц хъæбæрхор æфснайд, уый фæстæ — мæнæу. Алы гектарæй дæр исынц 29 центнермæ æввахс. Ныккарстой рапс дæр. Рады лæууынц нартхоры хуымтæ.
Хæдзарады ис æртæ фæсарæйнаг комбайны. Кусынц сыл Джелыты Тамик, Джелыты Аслан, æрыгон лæппутæ Бæтæхъойæ. Василий Ковалев та æххуысмæ æрбацыд Котляревскæйæ. æртæйæ дæр хорз арæхсынц сæ куыстмæ.
Фæлæ сæйраг механик Киситы Сергей куыд зæгъы, афтæмæй вæййы къуылымпытæ дæр. Комбайн куы асæтта, уæд ын фæсарæйнаг ивæнхай зын ссарæн у.
Сæрвитын æй кæнынц Уæрæсейы стыр горæттæй, уый та ахсы рæстæг. Фæлæ уæддæр куыст нæ лæууы. Ныртæккæ кæнынц хъæмпы, хосы тыхтæттæ. æмбырд сæ кæны Дамзаты Заур, ласгæ та — Джелыты Влад. æрмадзы куыстытæм хорз арæхсынц Касаты Алан, Сотишвили Таймураз, Дамзаты Мухтар æмæ иннæтæ.
Уыдонæн се ‘ппæты æдасдзинадæн дзуапп дæтты Хъæстуаты Руслан.
Ис куыстуат, куыст цæуы, фæллойæн алы мадзалттæ дæр ис, фæлæ нæ фаг кæны кусæг тых. æрыгæттæ зивæггæнгæ цæуынц хъæууон хæдзарадмæ, хъæуты цард азæй-азмæ мынæгдæр кæны. Ацы хъуыддагыл хъуамæ бæстон ахъуыды кæной, фарста кæмæ хауы, уыдон.
Хъæуы цард куы бамынæг уа, уæд æхсæнады зынгæ ивддзинæдтæ æрцæудзæн.
æвзæрырдæм...

СОКАТЫ Людæ.