ЦАРДÆЙ ИСТ ХАБÆРТТÆ

Иу ахæмы мæ телефоны зыланг фæцыд, систон хæтæл, æмæ дзы мæ зонгæйы кæугæ хъæлæс райхъуыст. Фæрсын æй:

– Цы кодтай, исты æвзæр хабар ис, цæмæн кæуыс?

Уый тынгдæр скуыдта æмæ афтæ:

– Цы хабар ма уа, мæ иннæ лæппуйы дæр та мын йæ хъæздыг каистæ горæтмæ цæрынмæ акодтой.

Æз æм дзурын:

– Æмæ уый цæмæй æвзæр у! Ды дæр ацу æмæ семæ цæр, дæуæн горæты цæрынæй дæ зæрдæ фæрисдзæн?

Уый мын хæкъуырццгæнгæ дзуры:

– Æмæ мæнæй куы ацыдысты, уæд ма мæ горæтмæ цæрынмæ кæнынц?!

– Цы уæм рауадис, æппæлгæ сæ куы кодтай, диссаджы хъæздыг хæстæджытæ мын ис, зæгъгæ.

– Мæнмæ дæр афтæ кастис, фæлæ хъæздыг хæстæг у уазал хæстæг.

Цымæ цæмæн афтæ у цард, мæгуырмæ уæвгæ ницы ис, хъæздыг та дæтгæ ницы кæны. Ау, иунæг æфсины рæвдауынæн цастæ хъуыдис, сæ хъæздыгдзинад та ма цы у, уæд? Йæ мад, дам, æм-иу алы бон дæр дзырдта: «Хъусыс, мæ чызг, ‘скъæтмæ ма бацу, хъуг макуы æрдуц». Цымæ хъуг дуцын цас диссаг у, æрыгон домбай адæймагæн. Уый фæстæ ваннæйы алыхуызон шампунтæй дæхи ахс, æмæ дæ куыстмæ фæраст у. Фæлæ сæ мадæлтæ сæхæдæг халынц.

Мæ зæрдыл ма æрлæууыдис иу ахæм хабар. Мæ хъæуккаг лæппу горæтаг чызг ракуырдта. Чындз хъæуы цард нæ бауарзта, æфсин æмæ йæ хицау дæр нæ бахъуыдысты. Акодта йæ лæджы горæтмæ цæрынмæ. Йæ хъæздыг цæгат сын балхæдта хорз фатер, зынаргъ машинæ, стæй сæ уарзон сиахсæн ссардтой бæрнон куыст. Лæппуйæ йæ хъæу, йæ ный- йарджытæ ферох сты. Фæлæ иу райсом лæппу йæ хуыссæны рабадт æмæ æн- къардæй джихтæ кæны. Йæ ус æй афарста:

– Цы кæныс, исты дæ риссы?

Лæппу загъта:

– Рисгæ мæ бæргæ ницы кæны, фæлæ дысон-бонмæ тынг æвзæр фынтæ фæуыдтон æмæ уыдоныл хъуыды кæнын.

Ус æрбамæсты ис:

– Цавæр æвзæр фынтæ хъуамæ уынай ды ам? Лæвар дын хорз фатер, зынаргъ машинæ, бæрнон куыст! Ноджы дæр ма æвзæр фынтæ уыныс? Ничи йæм кæсы, æви дæ фæдуарæтте кæнон?

Дуар ныгуыпп кодта æмæ йæ куыстмæ ацыдис.

Лæппу дисы бахауд: "Цымæ цы ракодтон æвзæрæй. Мæ цæстмæ мын цæмæн бадардта ацы цард. Æз дæр уыцы фынтæм хонæг куынæ арвыстон". Сабыргай йæ дарæс скодта, йæ дзыппæй систа машинæйы дæгъæлтæ æмæ сæ стъолыл æрæвæрдта. Гæххæт райста æмæ ныффыста: «Мæнæ уæ зынаргъ машинæйы дæгъæлтæ, уæ фатер стæй уæ бæрнон куыст дæр уæхи уæнт. Æз цæуын хъæумæ мæ мад æмæ мæ фыды мæгуыр хæдзармæ. Уым мæнæн алыхуызон фынтæ уыныны бар дæр уыдзæн». Дуар сæхгæдта æмæ дæгъæл сыхаг сылгоймагмæ радта.

Изæры йæ ус куы æрбацыдис, уæд æм сыхаг йæ дæгъæлтæ радта. Йæ рæдыд бæргæ бамбæрста, фæлæ йын дзы ницыуал рауадис. Лæппу йæхи хуызæн мæгуыр хæдзарæй чызг æрхаста, æмæ бинонтæ уарзонæй цардысты.

Нæ хорз фыдæлтæ хæдзар кодтой фыртæн. Чызджы та-иу радтой, хæдзар кæмæн ис, ахæм лæппуйæн, æмæ-иу хæларæй цардысты. Ныр чызгæн фатер куы балхæнынц йæ ныййарджытæ, уæд чындзы кæдæм ацæуы, уым йæхи фæтæргай кæны æмæ лæппуйы йæхимæ расайы.

Хорз уаид, бæргæ, горæтаг чызг хъæуккаг лæппуйы куы бауарзы, уæд ын-иу йæ фыд æмæ йæ мадæн дæр аргъ куы кæнид, æмæ сæ цард кæугæйæ куынæ æрвитиккой...

Къубалты Рая, Бæтæхъойыхъæу.