ЮБИЛЕЙ

Заманхъулы хъæуы астæу кады аллейæмæ æвддæсæм мар- тъийы Дзусаты Мæхæмæты фырт Ибрагимыл 110 азы кæй сæххæст уыдаид, уый фæдыл мысæн бонмæ æрæмбырд бирæ адæм. Йæ царды фæндæгты тыххæй раныхас кодта хъæуы хистæр Хъуысаты Хæмдзæт. Уый лæмбынæг радзырдта Ибрагимы уды конд æмæ царды хабæртты тыххæй. Советон Цæдисы Хъæбатыр Дзусаты Ибрагим райгуырд 1905 азы. Йæ æрыгон бонты кæмфæнды куы уыдаид, уæддæр йæ каст уыдис цъæх арвмæ. Куы-иу федта, уыцы тыгъдады цæргæс куыд «ленк» кæны уый, уæд-иу йæхицæн бынат нал ардта, йæ фыны дæр тахтис цъæх арвы хъæбысы.

Уыцы бæллиццы æлхынцъ заманхъуйлаг лæппуйæн тынгдæр райхæлд Краснодары кавалерион скъола каст куы фæцис, уæд. Уый фæстæ Оренбургы тæхджыты скъолайы ахæм лæмбынæг ахуыр кодта, æмæ йыл йæ ахуыргæнджытæ сæ цæст æрæвæрдтой. Каст æй фæцис иттæг хорз бæрæггæнæнтимæ æмæ æрвыст æрцыд Граждайнаг авиацийы управленимæ. Службæ кодта Бакуйы.

Ибрагим куыд тæхæг, коммунистон партийы иузæрдион хъæбул, афтæ фыдыбæстæйы раз йæхи равдыста стыр хъайтар æмæ хæстон разамонæгæй. Фыдыбæстæйы хæсты æрмæст йæхæдæг иунæгæй йе ‘фсæн цæргæсæй знаджы хъæрццыгъатæй æрæппæрста æхсæз, йе ‘мбæлттимæ та – цыппар. Фистæг æфсад Дзусы фырты тæхджыты хуыдтой «тигртæ» æмæ йæхæдæг дæр йæ радиостанцæ ‘схуыдта «Я – тигр».

Диссаджы сгуыхтдзинæдтæ æвдыста Ибрагимы 45-æм куынæггæнæн авиацион полкъ Дзæуджыхъæумæ бацæуæнты. 1945 азы Ибрагимæн лæвæрд æрцыд инæлар-майоры цин. Йæ дæлбар полчъы цæргæстæ знаджы хæдтæхджытæй æрæппæрстой 832, уыдонимæ Берлины операцийы – 219. Уыцы аз 29-æм майы гвардийы инæлар-майор Дзусаты Мæхæмæты фырт Ибрагимæн лæвæрд æрцыд Советон Цæдисы Хъæбатыры ном æмæ йæ риуæй йæ иннæ бирæ хæрзиуджытимæ сæрттывта сыгъзæрин стъалы. Ибрагим йæ царды фæстаг бонмæ дæр уыдис Ирыстоны иузæрдион хъæбул, кæстæртæн абон дæр фæзминаг æмæ дæнцæгæн хæссинаг.

Ибрагимы сæдæ дæс азы юбилеймæ Заманхъулмæ цы бирæ адæм æрцыд, уыдонимæ уыдысты йæ дыууæ чызджы Мордакова Роза, Сикорская Тамара æмæ йæ хъæбулы хъæбул Сикорский Алан. Уазджытимæ ма уыдысты: Къаболаты Солтан, авиацийы инæлар-майор, Бедойты Руслан, авиацийы инæлар-майор, Азиаты Алыксандыр – авиацийы булкъон, «ДОСААФ»-ы сæргълæууæг. Бæрæгбон срæсугъд кæныныл бакуыстой Культурæйы хæдзары директор Хосонты Иринæ, аивадон къорды разамонæг Сæлбиты Заремæ, скъолайы директор Сидахъаты Альбинæ, Хъуылаты Изольдæ, Карсанаты Радима æмæ скъоладзаутæ.

Мысæн изæры кæронбæттæны Дзусы фырты цыртдзæвæныл æвæрд æрцыд дидинджытæ.

ХЪУЫДАКАТЫ Хъасболат, æхсæнадон уацхæссæг.